❝السَّلامُ عَلَیْک یا اُمَّ الْمُؤْمِنِینَ❞
اے مؤمنوں کی ماں! آپ پر سلام ہو
❝النَّبِيُّ أَوْلَى بِالْمُؤْمِنِينَ مِنْ أَنْفُسِهِمْ وَأَزْوَاجُهُ أُمَّهَاتُهُمْ❞
نبی مؤمنین کے لیے ان کی اپنی جانوں سے بھی زیادہ حق دار ہیں اور آپ کی ازواج ان کی مائیں ہیں
سورہ مبارکہ احزاب، آیت 6
◀️ لغت میں "اُمّ" کا معنی ہر چیز کی اصل، بنیاد اور جوہر ہے، جیسا کہ قاموس القرآن میں آیا ہے:
أُمّ: ماں، ہر اُس چیز کی اصل اور بنیاد جس سے دیگر چیزیں وابستہ ہوں، سب سے بڑی چیز
قاموس القرآن، جلد1، صفحہ113
حضرت خدیجہ الکبریٰ (س) کی بے پایاں شان کے بیان میں یہی کافی ہے کہ آپ حضرت "امّ ابیہا"، "امّ الائمہ و الابرار" فاطمہ زہرا (س) کی معزز والدہ ہیں۔ چنانچہ حضرت خدیجہ (س) کی زیارت کے اس حصے میں ہم آپ کو "امّ المومنین" کے لقب سے سلام پیش کرتے ہیں؛ وہ مقدس آستانہ جہاں سے امامت کے انوار پھوٹتے اور عالمِ کثرت میں پھیلتے ہیں۔
حضرت فاطمہ زہرا (س) کی اپنی معزز والدہ کے ساتھ محبت کے بیان میں ایک روایت میں آیا ہے:
❝لَمَّا تُوُفِّيَتْ خَدِيجَةُ (رَضِيَ اللَّهُ عَنْهَا) جَعَلَتْ فَاطِمَةُ (صَلَوَاتُ اللَّهِ عَلَيْهَا) تَلُوذُ بِرَسُولِ اللَّهِ (صَلَّى اللَّهُ عَلَيْهِ وَ آلِهِ) وَ تَدُورُ حَوْلَهُ، وَ تَقُولُ:❞
امام جعفر صادق (ع) نے فرمایا: جب خدیجہ - اللہ ان سے راضی ہو - کا انتقال ہوا تو حضرت فاطمہ (س) رسول اللہ (ص) کی پناہ میں آ گئیں اور آپ کے گرد گھومتے ہوئے فرمانے لگیں:
❝يَا أَبَتِ، أَيْنَ أُمِّي❞
اے ابا جان! میری ماں کہاں ہے؟
❝فَنَزَلَ جَبْرَئِيلُ (عَلَيْهِ السَّلَامُ) فَقَالَ لَهُ: رَبُّكَ يَأْمُرُكَ أَنْ تُقْرِئَ فَاطِمَةَ السَّلَامَ، وَ تَقُولَ لَهَا:❞
اسی وقت جبرائیل (ع) نازل ہوئے اور عرض کیا: آپ کا رب آپ کو حکم دیتا ہے کہ فاطمہ کو سلام پہنچائیں اور ان سے فرمائیں:
❝إِنَّ أُمَّكِ فِي بَيْتٍ مِنْ قَصَبٍ، كِعَابُهُ مِنْ ذَهَبٍ، وَ عُمُدُهُ يَاقُوتٌ أَحْمَرُ، بَيْنَ آسِيَةَ وَ مَرْيَمَ بِنْتِ عِمْرَان❞
تمہاری ماں جواہرات کے ایک گھر میں ہیں جس کے گنبد سونے کے اور ستون سرخ یاقوت کے ہیں، آسیہ اور مریم بنتِ عمران کے درمیان مقیم ہیں۔
امالی طوسی، صفحہ 175
حضرت خدیجہ کبریٰ (س) رسول اللہ (ص) کی ازواج میں سب سے افضل و اشرف تھیں۔ چنانچہ لفظ "أَزْوَاج" جو جمع کی صورت میں ہے، مکمل اور کامل انداز میں آپ ہی کی طرف اشارہ کرتا ہے؛ یعنی رسول اللہ (ص) کی زوجیت کی تمام خصوصیات آپ میں مکمل طور پر ظاہر ہوئیں۔ چنانچہ سورہ فرقان کی آیت 74 کی تفسیر میں:
❝وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا❞
اور وہ لوگ جو کہتے ہیں: اے ہمارے رب! ہمیں ہماری بیویوں اور اولاد کی طرف سے آنکھوں کی ٹھنڈک عطا فرما اور ہمیں پرہیزگاروں کا امام بنا
آیا ہے:
❝قَالَ النَّبِيُّ ص قُلْتُ [لِجَبْرَئِيل ع يَا جَبْرَئِيلُ] مَنْ أَزْوَاجُنَا قَالَ خَدِيجَةُ ُ قَالَ قُلْتُ وَ مَنْ ذُرِّيَّاتُنَا قَالَ فَاطِمَة❞
نبی (ص) نے فرمایا: میں نے جبرائیل (ع) سے پوچھا: "اے جبرائیل! ہماری ازواج میں سے کون ہے؟" کہا: "خدیجہ۔" فرمایا: میں نے کہا: "اور ہماری ذریت میں سے کون ہے؟" کہا: "فاطمہ۔"
تفسیر فرات کوفی، صفحہ 295
اس آیت اور روایت میں جو بات قابلِ توجہ ہے وہ یہ ہے کہ اولاً "أَزْوَاجِنَا" اگرچہ جمع کے صیغے میں آیا ہے، لیکن اس روایت میں اس کی تفسیر حضرت خدیجہ کبریٰ (س) سے کی گئی ہے؛ اور ثانیاً "ذُرِّيَّاتِنَا" کا لفظ جو رسول اللہ (ص) کی ذریت کی طرف اشارہ کرتا ہے، حضرت فاطمہ زہرا (س) سے تفسیر کیا گیا ہے۔ یہ بیان اس حقیقت کو ظاہر کرتا ہے کہ رسول اللہ (ص) کی ذریت حضرت خدیجہ کبریٰ (س) کی بابرکت گود سے پھیلی۔ چنانچہ نبی (ص) نے ایک حدیث میں حضرت زہرا (س) سے خدیجہ کے بارے میں فرمایا:
❝إِنَّ بَطْنَ أُمِّكِ كَانَ لِلْإِمَامَةِ وِعَاءً❞
بے شک تمہاری ماں خدیجہ (س) کا رحم امامت کا ظرف تھا۔
مناقب ابن شہرآشوب، جلد3، صفحہ335
💠 نتیجتاً، حضرت خدیجہ کبریٰ (س)، حضرت فاطمہ زہرا (س) کی معزز والدہ، وہی خاتون ہیں جن کی بابرکت گود سے رسول اللہ (ص) کی ذریت پھیلی۔ آپ "امّ المومنین" ہیں اور ہم انہی کے زیارت میں اسی لقب سے آپ کو سلام پیش کرتے ہیں۔
جاری ہے...
